阿妹買的 white wine

阿妹靜雞雞係 sogo 買既, 諗住加埋長腳蟹, 氹吓我開心, 不過, 通常第一次都係俾人呃 -- 支酒係好難入口既, 而唔係 sales 姐姐講咁 "呢支都好易入口架".

縮骨遮

今日下晝又焗放半天假.

夜晚係老豆度食完飯, 同阿妹去惠康買咗好多維他奶 + 8kg 米 2 包 + 汽水 等 ... ... 一共六百幾蚊, 因為滿 $600 可以用張 coupon (平 $60), 加上明天星期六, 阿妹唔駛返工, 可以係屋企收貨, 所以一次買大佢, 唔駛老豆成日去托維他奶同米. 買吓吓買, 電話響, 原來 bunbun 早收工 (不過 星期六&日都要返工, 朝十晚二), 兩把縮骨遮都係bunbun 係新都城百貨買既, 不過淺藍色果把係佢自己揀, 而深藍色果把就係 pick up 咗我之後再去買, 係我揀既 -- 輕 d 我用好 d. 雖然我好高興 bunbun 記得我想要把縮骨遮, 但係我超憎佢開 ot 開到夜晚 十二 / 一 / 二 / 三點喎, 今次佢就想 "功可抵過" <-- br="br">
之後 bunbun 就去買咗一底雞蛋仔食, 本來想買既格餅賣哂, 好失望既時候, 居然俾佢睇到灣仔出名果間雞扒飯, 係港運城對面新開咗間分店 -- 於是就帶咗食飽飯既我去試 -- 唔... 我覺得又冇阿蘇施黃講到咁誇張 law.

Red Wine

近排有人很喜歡買紅酒

小動物

呢一隻係另一間寵物店的貓貓













相中究竟有幾多隻狗狗呢?

方包 & 牛油蛋糕

今日焗住放無薪假, 咁就開爐焗野食平衡吓. 首先出爐既係無花無款白麵包, 接住係牛油蛋糕仔一打.





洗完收拾完都日落西山...

補返好個天花

今日點零鐘, 終於管理處打俾bunbun, 話幫樓上師傅約時間 -- 由於某人個台係屋企係收唔清既, 電話來電話往之際, 原來佢地已經係門口 -- 嗱嗱臨換件衫, 好險, 差d背心示人 -- 某人開門既時候好似冇理我係度著緊衫喎!

由於師傅唔想下個禮拜做, 結果決定即刻開工, 雖然管理員何生叫個師傅要做防鏽先, 但係師傅梗係唔肯 (真係啋你都傻), 話補返英泥就得, 又話咁爆, 就算樓上有冇工程都會爆, 係遲早問題, 不過老細話要幫你整, 咪整 law, 都唔關事 ... ... 大概係咁啦, 因為我係廳, 佢地係廚房同bunbun 講, 我唔係聽得好清楚/詳細. 跟住師傅就叫我地自己搵報紙舖好, 佢要上樓攞料, 嘩, 冇報紙喎 -- 結果係何生幫手係樓下攞上黎 (結果佢仲攞多一條窄窄的白色窗簾布樣板), 我就快快手收起厠所d雜物/植物, 同埋廚房個架, 用跟手推開bunbun張書枱, 用條窗簾布樣板將個洗手盆同水龍頭包好, 叫 bunbun 拆張浴簾落黎舖個洗衣機同座廁 ... ... 當d 報紙舖得如火如荼, 師傅出現喇, 仲嫌我地未舖好, 頂, 個個人屋企都有大量報紙存貨架? 要等何生攞上黎呀! 仲要屋企有個事事要循規蹈矩, 有條有理一步步黎(冇錯, 不能跳步, 不能插隊, 不能換次序, 仲要整齊 -- 趕時間都係咁話, 冇情講)既某人, 依家咁樣, 已經好快架喇.

anyway, 終於補好咗, 終於將個地獄清乾淨, 終於拾返好還原, 終於終於我多咗條小割傷

越南pho

屋企附近新開既, bunbun 話唔知食乜, 就試吓呢間啦! 味道都唔錯! 因為店內冇位, 我地等咗一陣, 結果都係坐室外撐枱腳.

牛油雞翼 / 生牛河 / 咖哩牛腩撈檬

峰壽司

九點幾去到峰壽司都仲要等位, 不過唔係等好耐, 可能因為我地肯搭枱啦, 但係就冇影相, 因為坐既係卡位, 而對面係兩位好...既小姐, 費事以為影佢地喇!

食完飯去世貿逛 uniqlo, bunbun 買咗襪同底衫, 俾完錢都過咗 11 點, 於是就打道回府, 返屋企再 hea 過.

八八八日本北海道拉麵 8

阿妹請我食既生日飯, 本來去世貿食元氣, 點知執咗呀, 打去熱線 -- 銅鑼灣一間都冇呀! 算啦, 呢間想帶佢黎食好耐, 今次因為時間尚早, 唔駛排隊, 等一等就有枱喇. 之後陪佢去逛反斗城, 買玩具俾佢公司阿姐個bb仔. 返到北角, 突然好想食雪糕, 於是去咗百佳, 呢隻古古力兔係阿妹逼我影, 又話可愛, 又話要俾佢老豆估吓係乜喎, 真係冇佢咁好氣!

心意屋 2

今次九點後黎有折.

. 龍蝦汁帶子意大利飯 + 併盤
. 四式芝士 pizza

花花繼續開

花花大過葉

喂! 究竟邊個裝修?

樓上裝修, 搞乜鑽我個外牆, 裝角鐵搭棚, 仲要完全冇單聲, 有冇搞錯! 師傅鍾意玩雜耍, 都唔好用我個玻璃窗黎借力吖! 仲要留低幾個鞋印, 我都唔想搞到要報警!

留心睇吓:-
一枝鐵, 一粒螺絲
三枝鐵, 三粒螺絲

師傅唔驚, 我驚呀! 頂!

我要搬屋呀! help!

貓貓

行過寵物店, 看到這隻貓貓的睡相, 隔住塊玻璃都忍唔住要幫佢影返張相!