麵軒

bunbun 提早開完 OT, 本來諗住去大家樂鋸扒, 但我已經係老豆度食咗飯, 於是改去麵軒, 不過我又忍唔住口每樣食啲, 咁點減肥呀?

朱古力瑞士卷

在麵團等發酵的時候, 做了一條失敗了的朱古力瑞士卷. 這次我嘗試用分蛋法, 將蛋白先打好放雪櫃, 再打蛋黃, 就在我蠢蠢地把所有粉類篩進蛋黃時, 電話響起了, 是 bunbun 打來說可以放工回家吃飯, 想讓我去叫外賣 pizza, 但, 我在做蛋糕呀 - 我一邊聽一邊拌了幾下. 原程序是應該將蛋白也一起放進去, 但我沒有第三隻手去拿蛋白, 只好停下來, 就這樣, 蛋黃+粉結塊了, 之後再放蛋白拌也沒用, 惟有無奈地把它送進焗爐, 焗熟再算.

蜜糖麥包

由於 bunbun "本來" 要開 OT, 我一放工便閃回家玩麵粉, 打了 400g 的麵團, 一半放雪櫃冷藏發酵, 另一半做成 60g x 6 個的奶油卷 (butter roll). 結果 bunbun 提早回家, 叫了 pizza hut, 兩個人食到超飽還有剩. 於是這盤麵包出爐放涼後, 留起三個我明天食, 另外三個切半後放冰格, 等哪一天烤一烤, 抺牛油扮多士, 給 bunbun 做宵夜/早餐囉.

小曲奇

bunbun 話我早幾日應承佢焗曲奇, 但係點解變咗麵包喎, 於是食完晚飯, 煮完飯盒, 就開工, 100g 牛油的分量, 一共焗咗三次先焗完 (前後焗咗成個鐘), 應該有 5x 小塊, 冇得數係因為最早出爐果盤, 一陣就俾人食哂. 全部放涼後, 留起 18 塊明天攞俾老豆食.

20080727 晚餐 - 雜菜煲

西生菜/粟米芯/冬瓜/南瓜/杏鮑菇
炸魚皮/魚蛋/墨魚丸/芝士腸/磨菇腸/炒蛋/豬頸肉

話說晏晝 bunbun 游完水就去咗剪頭髮, 我就喺老豆度, 食咗哈密瓜/砵仔糕/炸豬扒/星洲炒米. 七點幾 bunbun 打黎話剪完頭髮, 問我返屋企未, 我嗱嗱臨走啦(拎埋半個哈密瓜), 仲要去買餸喎. 係凍肉舖買咗豬頸肉同炸魚皮, 就俾 bunbun 急 call, 我叫佢去百佳買住餸等我. 之後我地就係度:- 百佳 --> 惠康 --> 不如去大家樂鋸扒 --> 百佳 --> 返屋企, 好彩結果都買咗西生菜粟米芯冬瓜煮菜煲食, 如果唔係雪櫃啲南瓜同杏鮑菇點呀?

芝士菠蘿腸仔蟹柳包

呢次用嘅係噚日打好放雪櫃嘅麵團, 分為 7 份 @35g, 做成 pizza 狀, 中間按扁些較容易放餡, 先放腸仔蟹柳(拌千島醬+沙津醬+巴馬臣碎芝士), 再放菠蘿及芝士, 最後唧少少茄汁做裝飾.

今次一出爐, 就做咗 bunbun 嘅午餐, 前後食咗四個, 我攞咗三個返老豆度, 結果我一個都冇食, 唔知啲餡嘅味道同麵包嘅質感.

20080726 晚餐 - 雜菜煲

唐生菜/南瓜/日本白菇/杏鮑菇
墨魚丸/魚蛋/芝士腸

因為遲咗食晏, bunbun 改為游夜水. 我就喺 4:30左右, 攞啲出爐麵包同炆豬肉返老豆度. 約好 bunbun 五點半係 supermarket 等, 一齊買餸, 結果百佳冇葉菜賣, 好快咁買咗冬瓜南瓜同墨魚丸, 就走去惠康 meet bunbun, 再買埋其他菜, 同 2 x 1/2 個西瓜返屋企, 好開心呀, 又有西瓜食!

芝士碎蛋洋蔥吞拿魚包

一早九點多就被鄰居的敲打聲吵醒, 雖然很想嘗試冷藏發酵法, 但沒理由十點不到就打麵團吧? 於是上了一會網, 看了一會書, 待到十一時多才開始準備做麵包, 今次打了 400g 麵粉, 留起 2/5 做冷藏發酵實驗, 其餘就做了這款芝士碎蛋洋蔥吞拿魚包, 餡料加了片裝芝士及巴馬臣芝士, 包面則舖上 mozzarella 芝士. 因為雪櫃還有盒開了的鮮忌廉, 於是加了大概 30g 來代替同量牛奶.

蘿蔔炆豬肉

蘿蔔一斤/ 五花肉半斤（切成三分厚塊）/ 蔥四條（切段）/ 薑三片（拍碎）/ 熟油三湯羹（爆肉用）/ 糖一湯羹（煮蘿蔔用）

調味: 老抽二湯羹 / 糖一湯羹 / 紹酒一湯羹

. 蘿蔔刨皮切成菱形，用水兩杯，加糖一湯羹，將蘿蔔煮分鐘，將糖水泌去，蘿蔔備用
. 油三湯羹燒熱，加入薑、蔥及五花肉爆香，即灒入紹酒一湯羹及加入老抽，繼續炒兩分鐘即加入水一杯半，用慢火煮半小時，加入糖一湯羹，即倒入蘿蔔再煮十五分鐘，嘗試五花肉及蘿蔔俱腍，即可上碟

from: http://www.mihk.hk/forum/thread-576692-1-1.html

西瓜

本來諗住慰勞吓辛苦嘅bunbun, 於是放工就走去惠康買咗半個西瓜. 點知返到屋企, 等呀等, 都冇打電話俾我, 結果等到過咗八點半, 終於打黎喇, 居然係施施然咁同我講, 佢喺麥仔食緊野, 仲理所當然咁問我食咗飯未 - 有冇搞錯呀, 完全當我唔存在, 就唔駛打黎啦, 打黎同我講佢自己食緊飯, 咁係咩意思呀! 一句返唔返黎食飯都冇講, 我仲咩係度戇居居咁等! 之前又仲咩要為咗一句返黎食飯, 就仆倒咁仆去買餸仆返屋企煮, 三十幾度高溫呀, 白痴, 為奴為婢又為乜呀?

20080708 晚餐 - 煎蛋切雞米

因為噚晚唔係幾夠時間煮飯, 所以今日早啲放工, 本來諗住煮瀨粉, 點知買唔到, 算啦煮米粉啦, 清淡啲都好吖. 結果等 bunbun 放工等到八點幾, 好彩我都預咗佢今晚會遲啲, 我就用等嘅時間煮我的飯盒, 一共煮咗三個 (for wed to fri), 煮好洗完碗 bunbun 先打黎話搭緊巴士, 唔緊要啦, 反正煮個米粉既簡單又快趣.

20080721 晚餐 - 小唐菜飯

其實仲有碟蒸咗好耐都蒸唔熟嘅粉絲肉碎蒸水蛋, 餐飯都差唔多食哂先蒸好, 好冇癮. 而呢餐飯, bunbun 話啲雞翼好辣, 我就話啲菜飯太濕, 冇哂心機呀!

20080720 晚餐 - 雜菜煲

今次係 bunbun 游完水去買嘅菜

唐生菜/西生菜/粟米芯/冬瓜/南瓜/秀珍菇/玉子豆腐
炸魚皮/炸魚蛋/魚蛋/芝士腸

焗芝士蛋糕

焗了兩個芝士蛋糕, 內加藍莓醬, 半個俾細佬妹食, 另外用盒裝起六件, 等阿妹攞返公司, 剩下的 3/4 個就留返俾 bunbun 食.

終於都用完所有 cream cheese 喇, 以後買 2 kg 裝前, 真的要好好想一想.

蜜糖麥包

蜜糖麥包 (無蛋版)

因為麵團沒有放雞蛋, 所以包面也沒有塗蛋汁, 雖然唔靚, 但係好香蜜糖味, 放到第二日食都仲好軟熟. 一出爐我就食咗差唔多 2/3 個, 話就話當午餐, 但係真係太多喇.

札幌拉麵屋

本來 bunbun 話要去銅鑼灣果間 八八八拉麵, 但係我唔想係公司等佢放工, 於是改為幫襯北角呢間札幌拉麵屋. 今次係第二次幫襯, bunbun 仲記得要叫套餐 - $18x 包兩碗普通拉麵, 同三款小食. bunbun 果碗加咗牛油 (加 $5), 而小食就係 雞泡魚乾 / 炸蝦 (4隻) / 燒多春魚 (4隻).




話說我放工差唔多六點半先走, 打算返老豆度等bunbun放工, 諗起 weekend bunbun 可能會想食菜煲, 於是搭多個站地鐵去買"香脆蝦米辣椒", 順路去埋十蚊店買吸油紙, 點知經過惠康, 突然想食咖哩角, 就走咗入去, 不過結果係買咗春捲, 因為佢地啲咖哩角雪到硬一硬, 一大餅咁. 之後先再去東南亞舖頭, 本來仲想買沙爹醬, 但係唔覺眼有, 逛吓逛吓, 結果買多咗印尼甜豉油 / 辣椒醬 / 紅咖哩醬. 返到老豆度, 原來老豆等我返去先煮白灼蝦, 仲要我一齊食飯, 而阿妹就話買咗個好甜嘅哈密瓜, 切好要我食同帶走 -- 好明顯有好多野食, 但係我好衰咁堅持要炸春捲食, 結果我食咗幾隻蝦, 幾條春捲, 幾啖飯, 同十幾粒哈密瓜, 先去食拉麵呀笨人.

食完拉麵同 bunbun 散步返屋企, bunbun 話要去惠康探朋友 - 西瓜, 因為見切開一半嘅唔靚, 於是我是但揀咗一個未切的, 而罐御品鮑魚xo醬 ($12), 係喺收銀處見到買嘅.

Tiramisu 4

本來 lolo 約咗我今晚食飯, 點知佢朝早打俾我, 話有個親戚黎香港, 臨時要同佢地食飯, 結果我差啲要一個人食. 因為 bunbun 要開 OT , 阿妹又要開 OT , 於是我就係公司留多陣涼吓冷氣, 大概 6:45 先離開, 不過唔係返屋企, 係去灣仔買材料整甜點, 買咗兩盒 Mascarpone (@500g $62) 同兩包 (@1kg $15) 日本高筋麵粉. 嗱嗱臨返屋企開工整 Tiramisu, 連埋洗碗, 大概用咗 45 分鐘. 果時都 8:45, 就打電話俾阿妹, 睇吓佢放工未, 好彩佢已經 on the way, 係金鐘站, 於是攞埋盒 Tiramisu 去地鐵站接佢, 順便買飯食 - 因為老豆今晚冇煮飯, 結果我同阿妹兩個食咗個超細嘅 大x樂 兩焗飯, 少餸都算, 連飯都少, 勁呃/搶錢. 話就話豬扒貴咗好多, 但係人地美心咁上吓價錢做到焗豬扒飯, 大x樂就 cheap cheap 咁做兩焗, 一半係薄片豬扒加大範圍厚漿, 而另一半就做白汁雞肉, 得三大粒雞肉咋, 嘩, 平幾多呀! 今次呢個飯, 平心講, 唔好話兩個人 share 食唔飽, 就算我一個人食哂都唔飽呀!

布料

原來以前無聊時買落好多布, 但係幾年後布仍然是布, 幾時先會變製成品?

20080714 晚餐

日式咖哩雞
煎龍利柳
杏鮑菇涼拌豆腐
味噌湯 (即沖)

bunbun差唔多九點先返到屋企, 等佢返黎先煎魚, 九點多少少先開飯.

Java

http://java.sun.com/docs/books/tutorial/java/TOC.html

Interface
In its most common form, an interface is a group of related methods with empty bodies.

隨你鍾意

bunbun 游完水去隨你鍾意買嘅, 食咗幾件先問我點解唔影相, 唔, 我喺擺好哂之後就入咗廚房, 出返黎已經冇咗啲喎好似 ... ...

我今日好勤力, 做咗好多家務:-
. 漂洗廚房抺手布
. 洗廁所洗手盆&坐廁
. 手洗前日買果 5 條枱布
. 抺塵
. 吸塵
. 拖地
. 洗吸塵機 filter
. 洗衫







仲煮咗黑糯米糖水做宵夜添

20080713 午餐 - 日式煎餅

bunbun 特登找了這頁來照相, 話有老鼠食煎餅喎. 結果啲煎餅真係俾老鼠食哂, 仲咬到上唇呀 ~~

泰式茶餐廳

今日又輪到 bunbun 負責諗晚餐, 本來叫佢揸主意, 游完水喺天后買飯. 結果返到屋企時, 只係攞住張外賣紙, 話不如幫趁樓下間泰式茶餐廳, 因為係記憶中佢地啲炒飯唔錯, 於是叫咗:-

. 泰式菠蘿肉鬆炒飯
. 泰式辣椒羔海鮮炒河

原來佢地用嘅係薄而闊身的泰式河粉, 味道好好, 可惜油咗少少 -- 不過話時話河粉唔夠油又真係好難炒, 所以想食炒河都要預咗佢多油. 而個炒飯都好味, 一啲都唔油, 飯係軟身嘅, 但係就好似唔係幾見菠蘿嘅蹤影囉.

Toppings 5

bunbun 問我想食乜, 我突然想食炸野, 不如就食 Topping 啦, 但係又想食美心嘅公司三文治喎, 咁買哂返黎啦 - 係 bunbun 話嘅. 我本來話唔好, 費事佢咁辛苦要跑兩個地方, 但係 bunbun 話咁先夠食, 反正要去買咖啡, 去美心都係順路啫.

究竟依家啲人係點打工架? 其實係請唔到人, 求其有人返工就算? 定係上上下下都係咁差? 話說 bunbun 一向都係 starbucks 買咖啡豆, 先磨一半, 飲完再攞另一半去磨, 呢個方法係年幾前一個員工(都好耐冇見到佢, 唔知係唔係走咗)教嘅. 上次 bunbun 夜晚攞包豆去磨, 結果佢地磨粗咗, 返到屋企先知道, 又要再落街換過, 好彩因為我突然想飲咖啡先發現, 如果唔係 bunbun 第二朝就冇咖啡飲. 今次就係買過包新嘅, 又係先磨一半, 佢地居然用外賣紙袋 (好似麥仔咖啡色個啲) 裝起啲磨好嘅咖啡, 但其實 starbucks 係有專用袋裝, 係白色稍為厚身嘅紙袋, 除咗個質地外, 就同原裝包裝袋差唔多. 唔識唔緊要, 等你問同事等吓唔緊要, 但係自以為是而做錯, 就 ... ... 究竟有冇員工 training 架? 咁麥仔啲 training 好似好好多喎, 起碼唔會遇到用汽水杯裝雪糕, 新地杯裝麥旋風吖!

又係戰利品

bunbun 今晚又要好勤力咁開 OT, 打俾阿妹, 佢又有街去, 我本來諗住返屋企自己一個人食飯, 但係阿妹同我講話老豆好擔心姑媽, 因為姑媽個胃唔舒服, 要去醫院做撿查, 叫我返去陪吓老豆. 咁我就搭多個站係北角落車, 順便去十蚊店睇吓有冇新貨返, 其實我只係想買麻油同咖哩塊, 但係結果買咗咁多! 因為有我好想買嘅矽膠掃, 仲要係我最鍾意的漂亮藍色 (買兩支係我發現, 遇到好用的要多買一個備份, 因為下次唔一定買得返, 我之前個支好好用嘅膠刮刀, 想買都買唔到, 佢好用在係一整支啤出來, 刮刀同刀柄之間冇連接位, 清潔超方便).

之後攞住一大袋戰利品去買豬扒麵, 因為老豆話冇煮飯, 叫我自己買飯食, 佢同細佬就煮即食麵. 咁我就買三餸麵啦 - 豬扒魚卷牛腩(本來係五香牛肉但係賣哂)麵, 順便俾佢地加餸.

bunbun 放工黎接我, 我今次用一盒咖哩塊換咗四個橙, 只拎冇食呀! 喺返屋企途中 bunbun 話要去惠康探吓啲西瓜, 結果買咗我是但揀嘅一個大西瓜, 唔係好甜皮又有啲厚, 不過就好多汁.




$1 蚊可以買啲乜? 係大概 16吋 x 16吋 的枱布一張! 我一共買咗 5 張, 盛惠5蚊.
有顏色的仲要比白色的大張一啲.

20080710 晚餐

bunbun 話要食菜飯, 但我係兩間超市都見唔到小棠菜嘅蹤影, 惟有改煮其他有味飯. 於是係惠康買咗一包日本本菇, 而果半個西瓜 (好彩都幾甜) 係孝敬 bunbun 架 -- 佢好幾日冇得食, 前一兩日去過又見唔到靚西瓜, 好似幾失望喎.

話時話呢餐飯都煮得幾辛苦, 勁油煙, 又熱, 焗桑拿咁, 但係啲飯餸味道唔錯, bunbun 都有讚我呀, 雖然佢最開心仲係有西瓜食.




煎蛋 + 本菇肉片飯
煎蒜蓉豬扒
蝦仁豆腐

JDBC - Java Database Connectivity Tutorials

http://www.roseindia.net/jdbc/jdbc.shtml

JDBC is an API (application programming interface) specification developed by Sun Microsystems that defines a uniform interface for accessing various relational databases. JDBC is a core part of the Java platform and is included in the standard JDK distribution.

JDBC is consists of four Components: The JDBC API, JDBC Driver Manager, The JDBC Test Suite and JDBC-ODBC Bridge.

20080708 晚餐 - 牛肉烏冬

唔知 bunbun 幾時放工, 又唔知佢想食乜, 加上我返到北角時落好大雨, 唔想去超市買餸, 於是再煮牛肉烏冬, 簡單方便快捷兼乜都唔駛買, 攞啲牛肉出黎解凍就得.

20080707 晚餐 - 雜菜煲

西生菜/粟米芯/旺菜/冬瓜/南瓜
炸魚皮/炸魚丸/炒蛋/豆腐









我諗我都係傻傻地, 係百佳買咗三大袋 (仲有40隻雞蛋), 連埋把長遮, 行都行唔郁, 重到想掉哂佢地呀! 啲菜真係意想唔到咁超級重, 係高估咗自己定係低估咗啲菜呢? 我真係冇諗過會咁重, 買雞蛋同蕃茄係因為要帶飯, 早知唔買啦, 本來仲想去惠康買盒雜錦菇加落個雜菜煲架!

20080706 午餐 - 咖哩湯麵

煎蛋咖哩湯麵
吉列雞扒

今次係 bunbun 主動話要食上次個啲雞扒 (終於唔係豬扒喇)

今朝個天仲好地地, 點知晏晝就落大雨, 落到夜晚仲落緊(搞到晚餐要叫外賣), 冇得去游水嘅 bunbun 真係好失望, 仲嘥咗條新泳褲同新泳鏡添.

元氣壽司

因為 bunbun 瞓晏覺瞓到七點幾, 結果去到醫院, 已經差不多八點半. 姑姑生咗個心急嘅 bb 女, 早咗成個月出世, 得五磅幾, 差少少先夠重出院, 可能要係醫院渡多幾日假. 都係 bunbun 漏氣喇, 過咗八點嘅睇 bb 時間! 惟有遲啲等 bb 渡完假返屋企先再去探佢啦. 我地同姑姑傾咗幾句就走喇, 因為唔想阻住佢休息呀.



之後我地搭叮叮去銅鑼灣食飯, bunbun 諗完一大輪 (ucc / 拉麵 / 壽司), 結果話想食魚, 於是去咗元氣食壽司. 去到居然要等位, 之前幾次去都幾冷清吓喎, 唔知關唔關板前同板長事呢? 不過佢地安排坐位好似有問題, 明明睇到有十個八個吉位, 但係又要啲客係門口等, 都唔知係好忙定係唔想做生意呢? 結果我地等咗十幾二十分鐘, 坐低都成九點幾, 可能 bunbun 肚餓啩, 叫咗好多野食. 因為我地一共有兩張 DBS VISA, 可以叫兩碟五折嘅 special 壽司(熟蝦牛油果壽司 $9 / 海鮮加州卷 $15), 就係好sharp嗰兩碟, 其他都係平時食開嘅, 今次一共食咗十二碟, 好飽呀! 不過 bunbun 話佢地好似得好少款(4 定 5)嘅魚食, 唔係幾夠喎.

蛋糕食譜

Sponge Cake
. 蛋 5隻 / 粉 3安 / 糖 3安 / 油 1.5安

朱古力淋醬
cream 200g 加熱到 80 度離火 沖入切碎 苦甜朱古力 250g

黃金可可蛋糕 http://blog.xuite.net/jane7443/bake/142945016 吋 x 2 / 8 吋 x 1 / 布丁模 15-18 個
1. 鮮奶 60g + 奶油 65g 加熱至 65 度以上
2. 可可粉 22.5g + 低粉 50g 加入
3. 蛋黃 5 個 + 全蛋 1 個 + Rum 酒 15cc 分次加入拌勻
4. 蛋白 5 個 + 細砂糖 100g 打至 9 分發, 分兩次加入拌勻
5. 180度/160度烤至結皮, 降溫成 160度/140度, 共烤約 50 分鐘

黃金蛋糕 http://blog.xuite.net/jane7443/bake/13758695
6 吋 x 2 / 8 吋 x 1 / 布丁模 15-18 個
1. 鮮奶 60g + 奶油 75g 加熱至 65 度以上
2. 低粉 90g 加入
3. 蛋黃 5 個 + 全蛋 1 個 + Rum 酒 15cc 分次加入拌勻
4. 蛋白 5 個 + 細砂糖 100g-120g 打至 9 分發, 分兩次加入拌勻
5. 180度/160度烤至結皮, 降溫成 160度/140度, 共烤約 45-50 分鐘
6. 出爐後倒扣放涼
(如做蜂蜜蛋糕, 蛋白的細砂糖減少 50g, 改為蜂蜜 50g 加入蛋黃中打發)

唧花曲奇 http://lovecook2.mysinablog.com/index.php?op=ViewArticle&articleId=829446
牛油 125g / 糖粉 63g / 高筋粉 75g / 麵粉 45g / 鷹粟粉 45g / 蛋白 30g
1. 牛油放室溫至軟身備用 / 筋粉、麵粉和鷹粟粉過篩
2. 將牛油及糖粉用機打勻，再加入蛋白，最後加入所有粉類，打至完全混合
3. 放入7啞花唧咀唧出喜愛形狀，爐溫180度，焗約 30 分鐘至乾身
輝Sir 提示： 曲奇焗約10-15分鐘後會轉金黃色，可將爐溫轉至160度，熄火焗一會，令曲奇水份抽出，質地更鬆化。

唧花曲奇
牛油 8安士227g / 糖 4安士 113.5g / 低筋粉 300g  / 蛋 1隻

朱古力曲奇 (2 吋 25 塊)

牛油 100g / 黃糖 40g / 粟膠 20g / 蛋 100g / 黑朱古力粒 200g / 雲尼拿油 1/4 茶匙 / 高筋粉 160g / 低粉 30g / 可可粉 10g / 梳打粉 1 茶匙 / 入爐朱古力豆 80g

Waffle

雞蛋3隻 / 鮮奶160ml / 自發粉7oz / 糖3oz / 牛油2oz / 鹽少許

1. 雞蛋加進沙糖攪拌至蛋糊厚身 2. 加進鮮奶及牛油拌勻

3. 再加進篩過的自發粉拌至光滑無粒狀 4. 把蛋液注入窩夫機內

雞蛋 2隻 / 牛奶 1/2杯 / 低筋麵粉 120克 / 發粉 1/2 茶匙 / 砂糖 20克 / 牛油 50克
雞蛋 1 隻 / 鮮奶 200 毫升 / 自發粉 半杯加 2 湯匙 / 砂糖 1 茶匙 / 牛油 少許

麵包食譜

麥包
芝士火腿包
迷你菠蘿火腿薄餅 (@35g / 8cm / Thousand island dressing)
芝士粟米吞拿魚包 (@60g 先做成正方再切疊成菱形, 面放餡料再放pizza 芝士)
洋蔥吞拿魚麵包卷 (擀平成一大塊, 舖上"洋蔥+吞拿魚+沙津醬+pepper+herb", 捲起成長條狀，用沾水刀分切)
粟米吞拿魚麵包卷
芝士火腿麵包卷 (片裝芝士+火腿)
朱古力粒花卷

腸仔包 (高筋粉 1磅 / 糖 3安 / 水 8安 / 奶粉 1/2安 / 依士 1/3安 / 蛋 1隻 / 牛油 2.5安)
扭扭腸pizza (14 個 @15g, 卷起芝士腸, 切半, for 9 吋 pizza 圍邊)

http://www.nisshin.com/life/komugiko_club/meikan/04/index.html (movie)

x 子園

bunbun 放工去咗游水, 我就因為啲麻煩x 而遲放工, 成 7:45 先走, 急急腳搭地鐵去泳池門口等, 結果等咗十幾二十分鐘先等到, 跟住我地就係天后食飯.

我問 bunbun 想食乜, 佢居然話是但搵間未食過嘅, 結果入咗呢間, 至於好唔好食, 唔, 我只能講句, 佢點開分店架, 連總店一共有3間呀!!!! 勁難食喎, 叫咗個 手撕雞湯麵, 2 分鐘唔駛就上枱, 都估到佢有啲野喇, 麵太軟都算, 個湯冇味, 係一啲味都冇, 連鹹味都冇, 但係有色嗰喎 ... ... 另外叫咗一份餃子, 以為佢攞黎做店名, 應該ok掛, 但 ... ... 都係勁難食, 個皮嘅收口位係未熟透架, 食到硬硬的同麵粉味, 我勉強食咗兩隻(定係 3 隻? 記得一共有 10 隻), 其餘 bunbun 都食哂, 不過淨係食個餡同個底, 淨返哂啲收口位囉, 都有一小碗架. 好彩六點幾食咗 tea, 係公司樓下間茶餐廳, "港式"豬扒包 + 奶茶, 唔, 個豬扒包有酸瓜蕃茄同沙津醬, 係普通舊式咸餐包但冇烘底, 當然個包係凍嘅, 豬扒薄片都係凍嘅, 我冇嘥野食, 都有食哂 - 除咗杯好奶嘅奶茶飲咗一半同蕃茄冇食之外.

老麥

今朝阿妹打電話俾我叫我幫佢買股票, 買美聯喎, 咁我就兇佢問佢究竟有冇諗清楚, 跌咗點算, 升咗又點算, 結果佢話我唔俾佢買, 我唔係唔俾, 錢係佢嘅, 我只不過想佢諗清楚啫, 之後佢答我都係諗住買 2 手, 咁好少錢啫, 我幾驚佢好似佢老豆咁, 吓吓 10 手 10 手咁買. 好可惜隻美聯(1200)係我地嘅對話期間, 一路咁升, 由 4.2x 升到 4.5, 我妖完就冇買到, 點知之後仲有得升, 最高有 4.8x, 收市都仲有 4.7x. 我幾驚俾阿妹鬧呀, 咪 5 點幾打俾佢認衰, 佢就叫我請佢食飯補數, 我話我冇錢, 佢就話咁食麥仔嘅 四層黑椒漢堡, 於是放咗工就又約係地鐵見.

返到北角, 我地行咗屈人寺, 一人買咗一樣野 (本來諗住睇暗瘡藥, 點知好多牌子都冇), 之後陪佢去銀行提款俾家用, 再行埋莎莎 (都係百冇), 先去買外買麥仔食. 終於返到屋企, 打開個包盒, 咦, 阿妹話點解咁薄嘅, 好似仲薄過個巨無霸喎, 跟住佢好疑惑咁打開埋個包裝紙, 真係有四塊牛肉, 不過中間果層麵包夾扁哂, 加埋啲汁, 唔, 差不多變成糊狀. 阿妹話點解同廣告差咁遠, 我就冇睇過個廣告, 但係精明嘅消費者, 係唔應該相信廣告, 皆因十個廣告有十個都係呃人架.

20080702 晚餐 - 雜菜煲

今晚又係食雜菜煲, 不過bunbun冇幫我影相

今朝出門口帶埋 3 個牛油蛋糕仔, 諗住放工攞俾阿妹, 約佢係地鐵等, 一齊搭車返到北角, 係地鐵站提款俾老豆做家用, 之後去百佳買冬瓜(因為今晚要返屋企煮菜煲, 依家順路買咗先), 阿妹就買咗 2 包蝦條. 等緊過馬路嘅時候, 阿妹話想食煎釀三寶, 我地就穿過商場過一過冷河去買啦. 阿三寶又加咗價, $6 蚊得 4 件, 買咗 16 件, 盛惠 $24 大圓 -- 阿妹俾錢. 返到老豆度, 我就好肚餓咁食呀食呀, 仲去廚房摷咗做餸嘅炸豬扒黎食, 又衰衰咁撕咗 1/3 阿妹個早餐麵包黎食, 然後阿妹又俾咗啲牛油蛋糕仔我食. 之後仲叫我陪佢飲可樂(唔要)/檸檬茶(唔要, 咁肥全部都唔要), 我同阿妹講話我頭痛咗成日, 佢又氹我話飲可樂可以醫頭痛, 我啋佢都傻呀! 就係呢個時候, bunbun 打電話俾我, 我就嗱嗱臨執野走, 今次只係拎咗1個蘋果同6條芝士腸咋! 返去煮好個菜煲, 發現啲芝士腸唔單止好似阿妹講咁樣, 剩係變到啲皮好韌, 仲好似雪壞咗咁, 入面嘅質地都變咗呀! 嘥哂啲野食!

甜點食譜

麻糬 (from here)
a. 糯米粉 100g / 在來米粉 28g / 溫鮮奶 90g
b. 沙拉油 10g
拌勻 a, 取 20g 粉糰壓扁, 入滾水中煮至浮起瀝乾, 加入生粉糰, 充分揉勻, 再分成數小塊壓扁, 入滾水中煮至浮起, 瀝乾放入攪拌盆, 加入沙拉油, 用手或攪拌機打成光滑, 放涼後分小塊沾甜花生粉.

有糖
a. 糯米粉 100g / 在來米粉 28g / 砂糖 25g / 水 75g
b. 沙拉油 5g

20080701 晚餐 - 雜菜煲

今日外賣專員負責買餸, 游完免費水, 專程去百佳買餸返黎, 外加係新開張零食店買嘅小老板紫菜 2 包.

唐生菜/油麥菜/粟米芯/冬瓜/南瓜
墨魚丸/芝士腸/蟹柳

牛油蛋糕

今次用嘅係銀寶牛油($21), 好似比 elle & vire ($15.5) 香啲, 我留起 3 個俾阿妹, 隔住兩層膠袋都仲有好香焗過嘅牛油味.

一出爐 bunbun 就食咗三個, 仲話已經忍住唔食咁多喇. 又同我講呢個時候最好食係個面, 下次不如焗細個啲, 咁咪可以焗多幾個面囉.

20080701 午餐 - 咖哩湯麵

煎蛋咖哩湯麵
吉列紫菜雞柳

買咗拉麵, 梗係要煮返餐咖哩湯拉麵啦! bunbun 一見到就話好香, 之後我係廚房洗碗準備煮辛辣麵俾自己食, bunbun 突然入黎讚我, 話我啲豬扒好好食, 哈哈, 係雞肉黎架! 因為之前煮嘅豬扒好韌, 所以今次改用雞柳, 將 3 條雞柳解凍, 用刀背拍成較大的薄片, 中間夾一片紫菜, 沾沙津醬再沾麵包糠, 用少少油煎熟, 超簡單.