20080630 晚餐 - 雜菜煲

唐生菜/小唐菜/冬瓜/南瓜
炸魚皮/炸魚片/芝士腸/蟹柳

戰利品

今日食完飯, 就出咗去行街, 行吓行吓, 諗起不如去樓上燕窩莊睇吓啲 花旗參有冇減價, 去到舖頭門口時, 望到斜對面間凍肉舖, 就諗住不如去逛吓, 睇吓有乜野買, 結果俾我發現有拉麵賣, 係平時買開果隻烏冬嗰牌子, 於是就即刻買咗一包拉麵($9) + 一大包蟹柳($15).

之後行返去樓上燕窩莊, 哈哈, 終於俾我等到佢減價, 加拿大花旗參片(大片) 一樽 四兩 ($42), 我買咗四樽(嘩! 有 1 斤喎!) + 圓肉 1 斤 ($40).

包 cookies ($19.9) 係上個禮拜五係百佳買嘅, 今日放工就一口氣將佢地攞哂返屋企, 仲要攞埋把長遮, 好辛苦好重呀, 又試搵自己笨喇, 豬頭炳.

雪糕食譜

coffee ice-cream
http://blog.yam.com/kitty_bistro/article/11130565

檸檬雪葩
糖 300g / 水 300ml / 橙汁 1 個 / 檸檬汁 250ml

芒果雪糕
熟芒果 3 個 (400g) / 忌廉 250ml / 糖霜 90g

蜜糖乳酪藍莓雪糕
乳酪 (Greek yogurt) 300g / 急凍藍莓 100g / 忌廉 100ml / 蜜糖 1/4 杯

藍莓雪糕 / 藍莓慕斯
加熱藍莓果醬 180g / 泡軟魚膠片 1 片 / 檸檬汁 1/3 個 / 打6分發忌廉 250g

Raspberry雪糕
Mix Raspberry果泥 360g / 細砂糖 90g / 鮮奶 180g / then 忌廉 120g (打6分發)

鮮果乳酪杯
芒果蓉 125g / 糖 30g / 魚膠片 2.5g (浸冰水) / 乳酪 (Greek yogurt) 125g / 打起忌廉 75g
- 1/4 芒果蓉 + 糖 煮熱 + 魚膠片 + 剩餘芒果蓉 + 乳酪 + 忌廉 ==> 成 芒果乳酪慕絲
- 杯內放入水果粒, 再加入芒果乳酪慕絲

20080629 晚餐 - 雜菜煲

今日我去咗泳池門口等bunbun游完水, 一齊去超市買餸, 路過大快活時, 有人話要食 tea 喎, 試咗新的 -- 脆脆奶油包 + 咖啡, 聽聞唔係幾好食, 好似話個包唔夠脆.

唐生菜/小唐菜/冬瓜/南瓜
炸魚皮/炸魚片/芝士腸/蟹柳

20080628 午餐

吉列豬扒
煎蛋咖哩烏冬

本來 bunbun 想食咖哩拉麵, 但係屋企冇存貨好耐, 惟有食住烏冬先. 攞埋冰隔啲豬扒出黎解凍, 拍鬆 -> 調味 -> 拍麵粉 -> 沾蛋汁 -> 上麵包糠, 半煎炸成吉列豬扒, bunbun 好出奇有得加餸, 雖然啲豬扒幾韌, 但係佢都話好味.

買 mac 玩具

bunbun 放工約咗我 7:30 係銅鑼灣等, 話要 shopping 喎, 但係結果買咗 mac 仔就打道回府, 因為我係旁邊扮魔鬼, 叫bunbun唔好等第二日送貨, 不如即刻落街搭的士 -- 點知遇到個唔知做乜嘅司機, 唔知係真唔識路定係生意難做要兜路, 係糖街轉咗去柏寧酒店, 行告士打道去百德新街, 經過記利佐治街皇室堡(!!!咁駛乜托住 2x 公斤去糖街!!!), 出返高士威道去電器道, 兜個圏唔緊要, 係明知塞車都要兜就有啲問題, 結果個錶跳到25/6蚊都仲未兜返去皇室堡, 嘥人時間吖嘛, 我心急返去拆人地件玩具呀! ... 要搬開舊嘅 -> 抺枱 -> 拆箱 -> 組合 ... 執完仲要食飯喎, 時間緊湊呀!

結果九點幾先去天后食飯, 一排冇去, 好似bunbun 講咁, 多咗好多新舖頭, 但係我唔想試新野(驚會影響心情), 所以去食平時食開嘅越南粉 -- 大生牛河 + 春捲撈檬,

阿 mac 係唔係好靚仔呢? bunbun 玩到唔捨得瞓呀!

20080626 晚餐 - 牛肉烏冬

又係因為唔知 bunbun 幾時放工, 於是又煮牛肉烏冬, 簡單方便快捷, 而我就食辛辣麵.
今次 bunbun 冇影相.

八號風球

噚晚10:45掛咗八號風球, 冇乜風冇乜雨, 點知瞓到4點幾, 已經閂哂窗開冷氣, 仲俾啲風聲雨聲嘈醒咗, 連廚房嗰倘門都擺擺吓, 對面地盤更加吹到板板聲, 果然係打風喎! 一直俾佢嘈到六點幾都冇得瞓, 好慘呀! 之後因為實在太攰就瞓著咗, 但係結果都係八點幾就起咗身, 一直留意駛唔駛返工. 真係好羨慕 bunbun, 佢淨係4點幾(好大雨)同8點幾(鬧鐘響)醒過, 就差不多一覺瞓到11點幾12點. 之後煮咗一人一個麵, 食完就分別出門口返下晝.


因為上午冇辦公, bunbun 就話要開 OT. 而我放咗工 6 點半度打俾阿妹, 睇吓佢返唔返屋企食飯, 點知冇聽我電話, 我又突然好肚餓, 於是係公司坐多陣, 食包餅乾飲杯水先走囉, 走嗰時都差唔多6:50. 結果去到地鐵站, 阿妹先覆我話返緊屋企, 但係老豆叫佢自己買飯食, 老豆同細佬就食冷飯喎. 咁我同阿妹諗黎諗去都唔知食乜, 本來打算我返自己屋企攞支日式煎餅醬煮, 但係老豆又冇椰菜, 又有啲晏, 於是決定是但係大家x/美x買盒飯. 我坐緊車果時又諗, 不如去十蚊店睇吓有冇煎餅醬賣, 之後先去買飯, 咁就係我坐到北角站時, 阿妹打俾我, 話老豆話屋企有餸, 不如煮飯食, 咁仲好喇, 唔駛諗買乜. 結果我係十蚊店買咗兩盒咖哩塊, 一支炸豬扒汁(代替正式煎餅醬), 一包即食味噌湯包, 除咗一盒咖哩塊之外, 其餘都係買俾阿妹. 而晚飯我都有幫手煮蕃茄炒蛋同煎蝦, 老豆就煮蒜蓉粉絲蒸魷魚, 我食到要添飯呀, 飯後仲同阿妹食咗兩個橙, 超級飽. 今次又係又食又拎 -- 攞咗兩個蘋果兩個橙返自己屋企, 哈哈.

20080624 晚餐 - 日式咖哩雞飯

日式咖哩雞飯
涼拌椰菜絲

天氣很悶熱, 想來想去都唔知煮乜好, 去到百佳, 居然所有菜蔬(葉菜/瓜果)都賣光, 唔知係因為打風冇菜黎, 定係大家一窩蜂搶購哂? 剛剛(10:45)天文台掛了八號風球, 唔通師奶智慧, 一早就知? 究竟聽日駛唔駛返工呢?



我今次煮咗半個洋蔥, 兩個細薯仔, 兩小棵紅蘿蔔, 一塊半雞扒, 四塊咖哩磚. 煮多啲薯仔同紅蘿蔔夠我帶兩日 lunch box, 同埋留起半盒多汁少雞少紅蘿蔔嘅咖哩, 就帶返去俾細佬妹食, 結果盒咖哩係老豆度換咗少半磅紅提子返黎. 因為睇新聞知道就快掛八號風球, 食咗三粒阿妹剝皮去核嘅提子, 滾水淥腳就走喇, 趁未落雨嗱嗱臨返屋企呀. 經過生果檔, 見有正常 size (之前幾次見到都係奀奀的) 嘅火龍果賣, 就即刻攞錢出黎買咗一份, 盛惠 $15 蚊 三個 .

20080623 晚餐

bunbun 話要食菜飯, 但係我放工喺超市買唔到小棠菜, 結果煮咗:-

. 焗雞翼 (十隻)
. 煎蛋火腿丁


仲買咗半個西瓜做補償, 不過就一啲都唔甜, 好彩bunbun都食哂.

20080622 晚餐 - 雜菜煲

今日外賣專員又去咗游水(又係為咗個大太陽!), 順路買一圈冬瓜($8)返黎, 外加甜菠蘿一小個($12).

唐生菜/油麥菜/粟米芯/冬瓜/南瓜
火腿/炸魚皮/芝士腸/台式墨魚丸

麥包 (8%麥粉)

200度焗 20分鐘

. 33g 糖 改用 (17g黑糖+16g白糖+大半匙蜜糖)
. 133g 牛奶 改用 (90g淡奶 + 90g水)
. 倒咗失控地多的水, 只好猛加麵粉

黑糖+蜜糖令個包有淡淡的香味

藍莓芝士餅

今日 bunbun 居然主動話要食芝士蛋糕, 仲要係焗嗰隻, 咁幾熱都要整啦, 順便消耗咁啲甜忌廉 (換咗原食譜的淡忌廉 && 冇放糖), 整咗兩個細嘅, 趁 bunbun 去剪頭髮(最緊要太陽落緊山), 攞一個蛋糕 + 一塊麵包俾阿妹, 要肥大家肥嘛 -- 其實我前幾日有問過細佬妹食唔食芝士蛋糕架.

20080621 晚餐 - 雜菜煲

今日係外賣專員第一次負責買餸

唐生菜/油麥菜/粟米芯/冬瓜/南瓜
火腿/炸魚片/芝士腸/台式墨魚丸 (我覺得好難食, 調味好奇怪)


bunbun首先去百佳買餸, 再去惠康買咗半個有機蜜瓜 -- 咁都可以叫做蜜瓜? 超級勁難食.

陽光普照

用 Samsung L700 auto mode 影的


















用 Sony Ericsson K800i 影的










有差別喎, 哪一張好啲? 實際上天空是 Sony Ericsson 那張的顏色.

Toppings 4

外賣專員特登出去買的:-

. 煙辣腸熱狗
. 炸薯條
. 洋蔥圈 (細)
. 春捲
. cake light

食完待一會, bunbun 就飛奔出去游水, 話唔好嘥咗個大太陽喎, 仲話最好去郊遊 tim.

真材實料

bunbun今日6:45左右就返到屋企, 嗱嗱聲換衫去游水. 之後去咗買外賣, 間舖頭開張冇幾耐, 叫做真材實料(佢地claim用嘅係真翅). bunbun 就買咗:-
. 碗仔翅 (2人份)
. 醉雞 (例牌)
. 澳門豬扒包 1 個


我就喺佢去游水嘅時候, 將十幾粒荔枝剝殼去核 (其間受到轟炸機騷擾, 為免有人再次竭斯底里, 只好將其擊落, 徹底洗手再幹). 食完飯攞出黎, 轉頭 bunbun 就掃哂喇.

麥包 (8%麥粉)

200度焗 20分鐘

. 33g 糖 改用 (10g黑糖+20g白糖+大半匙蜜糖)
. 133g 牛奶 改用 (80g淡奶 + 65g水)

包很軟很香, 好好味, 我一口氣食咗半條.

家鄉靚糉

我今日嘅 lunch, 噚晚係老豆度食咗半隻, 再攞咗一隻返黎今日食, 又食又拎, 真開心.

戰利品 - 上倉

一早出去, 買咗五盒牛肉, 一包火腿, 一磅豬扒, 蟹柳紫菜壽司醋壽司卷.
行過生果檔, 見到有荔枝賣, 買咗3磅俾bunbun, 希望好食啦. 不過呢期日日都落雨, 都係唔好期望會甜, 有得食已經好好喇.

好多蚊

bunbun 影的

放工喺 MTR met 阿妹, 之後返我屋企攞埋罐梅粉同食麵碗, 又分裝咗一小瓶黑糖, 連埋啲紫菜, 一齊返老豆度食飯.

就係我諗住分裝黑糖嘅時候, 見到有隻蚊停係咖啡機後面, 放黑色夾仔的那條繩度, 好難打喎, 結果打咗兩下先打到, 其實係"夾"到而唔係打到, 係俾我左手嘅虎口位夾中, 我初初仲以為打唔到, 因為掌心沒遺骸呀, 但係阿妹話見唔到有野飛過, 於是我反手一睇, 嘩, 嚇得我吖, 原來隻野(上啲果隻)好完整咁瞓係我個虎口位, 好核突呀, 搞到我打咗好幾個冷震.

另外果隻就喺 bunbun 放咗工, pick up 埋我返到屋企時, 我係廚房, 睇到隻野尾隨 bunbun, 由廁所往廳的方向逃去無蹤, 但係 bunbun 就話唔見廳度有蚊, 我梗係心有不甘啦, 走去踎低睇吓廚房度門, 果然見到隻野施施然咁著咗陸, 說時遲那時快, 我即刻拎起隻拖鞋, 手起鞋落, 隻野就變成下啲果隻, 阿彌陀佛.

今年成日落雨, 加埋對面街個討x厭超人地盤(講開就把幾火, 大x哂, 之前打樁, 打準時星期一至六, 7:00 至 7:00, 頂, 準時朝早7:00, 一分鐘都冇遲過, 嘈x到吖), 搞到咁叉多蚊.

戰利品 - 紫菜

今次醒咗, 買啲輕嘅, 四包小老板紫菜, 諗住原味+山葵味俾阿妹, 辣味+山葵味留返bunbun同我食. 如果今晚bunbun要開OT, 我就攞返去老豆度, 原味係孝敬佢嘅, 因為上次佢自己偷偷地攞咗山葵味黎食, 唔受得嗆鼻個樣好搞笑, 所以今次買包原味佢食, 上次冇預佢份, 係唔知佢鍾唔鍾意食紫菜咋.

20080618 晚餐 - 牛肉烏冬

日日都落大雨, 係傾盆大雨, 橫風橫雨, 好煩呀! 以為出返太陽, 點知轉頭又落過.

菠蘿粟米沙津

bun的: 牛肉烏冬
我的: 辛辣麵

戰利品

今日食完個lunch box, 見冇乜雨, 就走咗落街, 首先行咗去電腦場, 嘟一嘟張發達通(放工搭嗰程就可以平兩蚊), 之後去樓上燕窩莊, 買咗半斤杞子(俾bunbun明目), 跟住就行永樂街返公司, 經過間舖頭, 居然俾我看到有疑似蕃茄味嘅小老板紫菜賣, 但係因為落雨, 放係門口賣嘅貨, 都俾張厚膠冚住咗, 睇得唔清楚, 又唔知賣幾錢, 落雨趕客 -- 都係下次好天再黎過, 因為佢地仲好似有其他未見過嘅味賣呀.

放工見冇落雨, 又唔駛買餸 (因為bunbun話食牛肉烏冬), 咁咪決定去價真棧買我想買咗好耐嘅蜜糖, 咁就出事喇 -- 返到北角, 一出地鐵站, 嘩! 使唔使咁大雨呀! 我拎到兩手都係 (杞子半斤/梅粉300g/黑糖1000g/蜜糖5lb=2270g), 重到吖, 唔好話開遮, 齋拎都好辛苦啦. 好彩等咗一陣啲雨就細咗, 嗱嗱臨急急腳走返屋企, 好攰呀, 下次都係唔好咁貪心買咁多, 仲要蠢到係上環拎返北角呀. 為誰辛苦為誰忙呀白痴.

有益湯水

杞子味甘性平，有補腎、滋陰、養肝、明目、益氣等功效，是平補之藥
菊花、杞子兩者均有明目、養肝、益血、降血糖血壓、抗衰老、防皺紋、固精氣等保健功效

紅棗桂圓黑糖茶
杞子桂圓茶
杞子菊花茶

薑茶 (可減肥 / 行氣暖身)
薑2-3片, 加水 1L 滾起後小火煮約10分鐘, 加適量黑糖
一日兩次 (早起 & 浴前)

20080617 晚餐

沙爹牛肉粉絲
蔥花炒蛋
涼拌豆腐

20080616 晚餐 - 雜菜煲

唐生菜/粟米芯/冬瓜/南瓜/金菇
炸魚皮/炸魚片/黑椒牛丸/芝士腸

20080615 晚餐 - 雜菜煲

小唐菜/唐生菜/粟米芯/冬瓜/南瓜
炸魚皮/炸魚片/黑椒牛丸/芝士腸

菠蘿腸仔包

高筋粉 230g
麥粉 20g
淡奶 + 水 153g
蛋 3/4 隻
糖 10g + 好立克麥片 (沖來飲太甜, 做包消耗一下)
鹽 少許
yeast 1/2 小匙
牛油 25g

先用200度焗11分鐘, 再用250度焗2分鐘上色

Gathering - 春夏秋冬

同 lolo 好耐冇見, 約埋佢老公, 加埋 Claudia , 連我一共四個, 齊齊係北角嘅春夏秋冬打邊爐. 今次叫嘅嘢食全部都好健康, 主打蔬菜/菇/豆腐/海鮮(鮑魚/聖子/斑片), 加皮蛋芫茜湯底, 連辣椒絲都冇叫. 出黎聚吓, 想坐耐啲, 但係又唔想咁熱氣, 想來想去, 結果都係揀咗呢度, 貪佢坐得耐唔趕客. 唔知係唔係因為黎得多, 俾咗張大枱我哋, 坐都坐得舒服啲.

埋單八百幾, 多謝人地老公強哥請食飯.

潮樓

同bunbun, leo, 世伯去咗銅鑼灣潮樓食父親節晚飯, 四個人叫咗:-
. 鹵水併盤
. 沙茶牛肉(芥蘭底)
. 火腿龍鳳球
. 糯米釀大腸

埋單$34x, 免茶芥, 免加一

20080612 晚餐 - 雜菜煲

小唐菜/唐生菜/粟米芯/冬瓜/南瓜
炸魚皮/炸魚片/黑椒牛丸/芝士腸

噚晚食剩d豉油雞, 去骨手撕後, 淋上混汁(老抽/雞湯/麻油/味醂/紹興酒/糯米酒), 味道唔錯

南瓜好甜, 好粉 - 不過原來係bunbun唔鍾意嘅質感

20080611 晚餐 - 油雞湯米

bunbun's very late dinner

五月初八, 我返咗老豆度食飯, 而 bunbun 就開 OT, 開到差不多十點先走. 老豆硬是塞了大半隻豉油雞我攞走, 話要俾 bunbun 食喎, 而 bunbun 話可以慳錢, 所以冇去買麥仔, 今晚改食雞.

講開雞, 話時話好彩雞 is not my favor, 如果唔係有排冇雞食, 都唔好話唔痛苦 -- 皆因政府話驗到 H5N1 喎, 要殺哂啲雞, 仲唔知幾時先恢復入口呀!

蘭州拉麵 n+2

bunbun 話好耐冇食蘭州拉麵, 放工接埋我一齊去, 兩個人叫咗:-
. 醉雞
. 小籠包
. 雞絲粉皮
. 回鍋肉炒年糕
. 一杯豆漿


食完先記得影相 :p

陽光普照的假期

今天端午節補假, 終於是一個大大的晴天, 陽光普照.














今日我繼續偷懶
午餐
. bun 的 煎蛋出前一丁 / 我的 辛辣麵

晚餐
. bun 的 薯片 / 我的 果仁朱古力

宵夜
. 西瓜 (多謝外賣專員特登出去買的)
. 意大利雜菜湯 + angel hair

自家製雪糕

藍莓雪糕
朱古力雪糕


味道不錯但唔夠滑, 有點食雪葩的感覺

沒有雪糕機, 每隔半小時從雪櫃取出, 攪拌一下, 重複三四次

Lunch box

炒蛋 (洋蔥/蔥花/蕃茄/腸仔/火腿/蟹柳)
滷肉 (烚蛋/紅蘿蔔/薯仔/洋蔥/鮮冬菇/豆卜/雲耳)
洋蔥炒薯仔絲
炒椰菜(蒜蓉/豆瓣醬)
豆腐 (韓式辣椒醬 / 豆瓣醬)

洋蔥椰菜 炒麵 / 炒烏冬 (泰式紅咖哩醬 / 韓式辣椒醬)

終於落完雨 天放晴

落咗個幾星期的雨, 大雨細雨, 天天落過不停, 噚日落埋場黑雨, 夠哂啦. 終於今日見返個太陽, 雖然時陰時晴, 但係 bunbun 就急不及待咁兩點幾就出咗去游水, 返黎話好攰, 可能因為上個禮拜停咗一次冇去游水喎.

我今日當然繼續懶懶閒, 煮咗幾塊hot cake俾bunbun食, 而我就食咗兩個包, 加杯熱朱古力奶當午餐. 而晚餐就由特派外賣專員負責, 打電話去"隨你鍾意壽司"落order同pick up.

芝士腸仔包

高筋粉 230g
麥粉 30g
淡奶 80g + 水 75g
蛋 3/4 隻
糖 33g
鹽 少許
yeast 1/2 小匙
牛油 25g

200度焗15分鐘


p.s. 留到第二天中午吃的有點乾

Toppings 3

嘩, 今朝又落黑雨, 嘈到冇覺好瞓, 結果瞓到兩點幾, 食乜好呢? bunbun 話不如食Topping, 有人負責我緊係話好la, 於是外賣專員去咗買:-

Toppings
. 熱狗
. 炸薯角(一大盒)
. 炸咖哩角

美心
. 公司三文治 + 咖啡




食完飽到晚飯都唔想食, bunbun 就提議食西瓜, 但係要去買喎! -- 結果偉大的外賣專員就自己一個去惠康, 買西瓜俾懶豬食, 附帶: 一盒夏威夷果仁朱古力(26粒) / 兩支 pineapple vodka drink / 兩杯乳酪





睇新聞先知今次黑雨好大件事, 成幅護土牆(重20噸)塌下, 大澳無水無電無電話, 北大嶼山公路大水浸, 搞到機場快線逼 爆, 昂坪360受損搶修, 上環海味街變咗海味河, 有鮑魚/海蔘/魚翅釣 ... ... 唉 ... ...

20080606 晚餐 - 牛肉烏冬

bunbun要開OT, 話就話7點幾八點返, 但係通常都會遲, 煮烏冬比較快, 可以係等巴士的時候開始煮, 返到屋企就剛好有得食啦.

20080605 晚餐 - 白汁焗飯

bunbun gtalk 話要食白汁焗飯 -- 焗飯, 咁咪要炒底, 但係屋企冇白飯喎, 點好呢? 無辦法啦, 特登煮一煲白飯, 再攞一碗出來變炒飯囉, 難得佢想食呀.

就放工時老豆打電話叫我返屋企, 話有新鮮姑媽牌家鄉靚糭攞, 既然bunbun冇咁早收工, 我就返咗老豆度攞糭, 順路係凍肉舖買咗啲魚柳/肥牛肉/雞肉腸. 返到屋企已經七點幾, 嗱嗱臨洗米煮飯, 將魚柳同蝦仁解凍. 結果bunbun八點多啲仲等緊車, 我就自己預時間炒飯, 煮白汁, 放焗爐焗飯, 煎魚柳, 好彩, 啱啱好入屋就開飯. 個焗飯佢一人獨享, 而我就食糭, 不過因為肚餓, 個糭分咗兩次食, 就係煮飯前同煮飯後.

20080604 晚餐 - 小棠菜飯

小棠菜飯
焗雞翼
火腿炒蛋
涼拌粟米豆腐

涼拌菜

蛋絲拌韭菜(韭菜灼熟+鹽後隔水 + 1/2糖:1麻油)
粉絲雞絲蛋絲拌菠菜(1醋:2辣醬油:2麻油)

蕃茄拌豆腐 (蕃茄去皮切丁/豆腐壓碎 +糖+鹽 拌勻)
蔥花韭菜花拌豆腐 (2醬油:1麻油:1酒)
蔥花麻酱拌豆腐 (5芝麻醬:1醬油:1鹽 姜末/蒜泥)
肉末拌豆腐 (肉末炒過, 撒葱末, 淋麻油红油)

20080603 晚餐 - 切雞瀨

bunbun 點的:

涼拌粟米豆腐
切雞瀨

早知早啲放工啦, 返到北角落大雨, 買完餸離開惠康雨下得更大, 好似之前黑雨咁, 傾盆大雨, 行雷閃電, 有遮都冇用, 返到屋企全身濕透 ... ...

20080602 晚餐 - 雜菜煲

小唐菜/唐生菜/冬瓜/勝瓜/生根
黑椒牛丸/魚腐/芝士腸/火腿/洋蔥豬肉丸

20080601 晚餐 - 雜菜煲

小唐菜/白菜仔/唐生菜/豆卜/生根
黑椒牛丸/魚腐/芝士腸/豆卜釀肉