戰利品

今日食完個lunch box, 見冇乜雨, 就走咗落街, 首先行咗去電腦場, 嘟一嘟張發達通(放工搭嗰程就可以平兩蚊), 之後去樓上燕窩莊, 買咗半斤杞子(俾bunbun明目), 跟住就行永樂街返公司, 經過間舖頭, 居然俾我看到有疑似蕃茄味嘅小老板紫菜賣, 但係因為落雨, 放係門口賣嘅貨, 都俾張厚膠冚住咗, 睇得唔清楚, 又唔知賣幾錢, 落雨趕客 -- 都係下次好天再黎過, 因為佢地仲好似有其他未見過嘅味賣呀.

放工見冇落雨, 又唔駛買餸 (因為bunbun話食牛肉烏冬), 咁咪決定去價真棧買我想買咗好耐嘅蜜糖, 咁就出事喇 -- 返到北角, 一出地鐵站, 嘩! 使唔使咁大雨呀! 我拎到兩手都係 (杞子半斤/梅粉300g/黑糖1000g/蜜糖5lb=2270g), 重到吖, 唔好話開遮, 齋拎都好辛苦啦. 好彩等咗一陣啲雨就細咗, 嗱嗱臨急急腳走返屋企, 好攰呀, 下次都係唔好咁貪心買咁多, 仲要蠢到係上環拎返北角呀. 為誰辛苦為誰忙呀白痴.